ءماجىلىستىڭ قازاقستان حالقى اسسامبلەياسى اتىنان سايلانعان دەپۋتاتتارى، اتاپ ايتقاندا، روزاقۇل قالمۇراتوۆ پرەمەر-مينيستر كارىم ماسىموۆكە دەپۋتاتتىق ساۋال جولداي وتىرىپ، جىلداعى ادەتكە باسپاي، تاۋەلسىزدىك كۇنى ءتيىستى دەڭگەيدە تويلانبايىنشا، جاڭا جىل قامىنا كىرىسەتىندەرگە شەكتەۋ قويۋدى سۇراعان. بۇل تۋرالى Bnews.kz حابارلايدى.
«تاۋەلسىزدىك كۇنى – جاس مەملەكەتىمىز ءۇشىن ءبىرتۇتاس ەلدىكتىڭ، ىنتىماقتىقتىڭ، سالاۋات پەن بولاشاققا دەگەن ءۇمىتتىڭ مەرەكەسى. ەندەشە، بار يگىلىگىمىزدىڭ باستاۋى بولعان تاۋەلسىزدىگىمىزدى باعالاۋ ءۇشىن تاۋەلسىزدىك مەرەكەسىنە دەيىن جاڭا جىل مەرەكەسىنە قارقىندى دايىندىق جۇرگىزۋگە وركەنيەتتى شەكتەۋ قويىپ، تۇڭعىش پرەزيدەنت كۇنى مەن تاۋەلسىزدىك كۇنىنە اۋقىمدى تۇردە دايىندىق جۇرگىزۋدى جانە وتكىزۋدى ۇكىمەتتىك دەڭگەيدە قولعا الىنۋى ءتيىس دەپ سانايمىز. بۇل ماسەلەگە قاتىستى جاۋاپتى جازباشا تۇردە جاريا ەتسەڭىزدەر»،- دەگەن دەپۋتات. دەپۋتاتتىڭ ايتۋىنشا، جاقىندا كۇنتىزبەگە ەنگىزىلگەن تۇڭعىش پرەزيدەنت كۇنى مەن تاۋەلسىزدىك كۇنى جىلدان-جىلعا شىرشانىڭ كولەڭكەسىندە قالىپ قويادى.
«جەلتوقسان ايى باستالماي جاتىپ، ەلىمىزدىڭ بارلىق قالالارىندا جاڭا جىل مەرەكەسىنە دايىندىق باستالىپ كەتەدى. بيىك عيماراتتارعا قۇتتىقتاۋ سوزدەرى ءىلىنىپ، ميلليونداعان اقشا جۇمسالىپ، شىرشالار ورناتىلا باستايدى. ءبىراق، جاڭا جىلعا دەيىنگى ەلىمىز ءۇشىن ۇلكەن مەرەكەلەر – تۇڭعىش پرەزيدەنت كۇنى مەن تاۋەلسىزدىك كۇنى مەيرامدارى تۋرالى ەشقانداي اقپاراتتار كەزدەستىرمەيسىز. تەك قانا ءۇش-تورت كۇن قالعاندا بۇقارالىق اقپارات قۇرالدارىندا، كەيبىر باعدارلامالاردا جۇگىرتپە جولدار بەرىلە باستايدى. بۇل تاۋەلسىزدىك كۇنىن جاڭا جىل مەرەكەسىنىڭ، شىرشانىڭ كولەڭكەسىندە قالىپ قوياتىنىن كورسەتەدى. ەگەر ءبىز ۇلت رەتىندە تاۋەلسىزدىگىمىزدى ءقادىر تۇتساق، ەڭ الدىمەن وسى مەيرامدارعا كوڭىل ءبولۋىمىز كەرەك. ءبىز جاڭا جىلدى تويلاۋعا، قالالاردى، ەلدى مەكەندەردى بەزەندىرۋگە، شىرشالاردى ورناتۋعا قارسى ەمەسپىز. ءبىراق، الدىمەن تۇڭعىش پرەزيدەنت كۇنى مەن تاۋەلسىزدىك كۇنىن مەرەكەلەگەننەن كەيىن جاڭا جىلدى قارسى الۋعا كىرىسسەك تە بولار ەدى عوي. جەلتوقسان ايىن تۇڭعىش پرەزيدەنت كۇنى، تاۋەلسىزدىك كۇنىن تويلاۋمەن وتكىزۋدىڭ تاربيەلىك، تاعىلىمدىق ءمانى قانشالىقتى زور ەكەنى بەلگىلى. سول سەبەپتى، ۇكىمەتكە جەلتوقساننىڭ ءبىرىنشى جارتىسىندا وسى مەرەكەلەر رۋحىنا سايكەس، كوشەلەر مەن قالالاردى ەلباسىنىڭ الۋان ءتۇرلى قىزمەتىن كورسەتەتىن، تاۋەلسىزدىك رۋحىن تانىتاتىن پلاكاتتار مەن ستەندتەر، جارىق بەرۋشى تابلولارمەن بەزەندىرىپ، جۇيەلى تۇردە حالقىمىزدى، جاستاردى وتانسۇيگىشتىككە، بىرلىككە، قوعامدىق كەلىسىمگە شاقىراتىن ءىس-شارالاردى ۇيىمداستىرۋ ءۇشىن ءتيىستى مينيسترلىكتەرگە جانە جەرگىلىكتى اتقارۋشى ورگاندارعا تاپسىرۋدى ۇسىنامىز»، - دەپ تۇيىندەگەن ءوز ءسوزىن قالمۇراتوۆ.
قازاقستاندا جىل سايىن جاڭا جىل دەپۋتات ايتقانداي ۇردىستە تويلانادى. جاڭا جىلعا ءبىر اي ۋاقىت قالعان ساتتەن باستاپ كوشەلەر، مەملەكەتتىك مەكەمەلەر بەزەندىرىلىپ، شىرشا ساندەلەدى. مەملەكەت اۋماعىندا مىڭداعان شىرشالار تىگىلىپ، وندا ەكى اي بويى جارقىلداپ، قاپتاعان شىراقتار جانىپ تۇرادى. ەسەسىنە قازاقستاننىڭ تاۋەلسىزدىك كۇنى تەك بىرنەشە كۇن عانا اتاپ وتىلەدى، ءان ۇران ايتۋ مەن شاعىن جينالىستار عانا ۇيىمداستىرىلادى. ەسكە سالاتىن بولساق، سوڭعى جىلدارى قازاق ءتىلدى جۋرناليستتەر دەپۋتات ايتقان ماسەلەنى ۇزبەي جازىپ كەلە جاتقان بولاتىن.
